ИДЕА ЗА БИЗНИС Јануари 17, 2010

За да почнете со бизнис, најпрвин треба да имате некоја идеја – што сакате да работите?

Најдобар начин да имате добра идеја, е да имате многу идеи!

Бизнис идејата е почетокот на вашето планирање. Од неа доаѓаат сите натамошни размислувања за тоа како од таа идеја можат да се направат пари. Некој ќе рече дека денес во светот се е веќе измислено и нема што друго да се измисли. Некој друг пак ќе рече дека неговата идеја е оригинална и не ја кажува никому за да не му ја преземат. И двете страни се во право. И не се!

Точно е дека денес во светот што се движи молскавично во сите можни аспекти на живеењето, се повеќе луѓе измислуваат нови производи, услуги, нови начини и стилови на работа и нови пристапи. Светот денеска напредува толку брзо, што е скоро невозможно да се следат сите промени во одреден сектор на некој бизнис, а камо ли да се следат сите новитети на повеќе полиња истовремено. И навистина е тешко да се измисли нешто ново…

Но, кажете му го тоа на Бил Гејтс од Microsoft или на Џеф Безос од Amazon.com! Каже те им го тоа на „момчињата“ од Coca Cola што ви го продаваат истиот пијалак со години! Тие пронајдоа нови начини на заработка со тоа што понудија нешто ново, нешто што на пазарот не беше дотогаш понудено. Било да е тоа тотално нов компјутерски систем наменет за обичниот човек, или он-лајн аукциска куќа каде можете да купите се и сешто од другиот крај на светот, или пак тоа е пијалак што ја задоволува жедта на милиони луѓе ширум планетата. Иновативноста не е секогаш нудење на нешто ново. Понекогаш е пронаоѓање на оној дел што може да се изведе поинаку, подобро или побрзо за да задоволува одредени потреби на пазарот. На пример, можете да имате најобична цвеќара, но луѓето да доаѓаат кај вас затоа што многу добро ги аранжирате букетите и вршите бесплатна доставка до сечиј дом. Или пак може да имате видеотека, која за одредена членарина, на своите клиенти им нуди бесплатен каталог на најновите филмски наслови преку е-маил.

Иновативноста на еден бизнис може да биде и една сосема обична дополнителна услуга, која ве одвојува од конкуренцијата и го прави вашиот бизнис поразличен од другите, но таа најпрвин мора да ги задоволува потребите на клиентите. Само така иновацијата може да го направи вашиот бизнис успешен!

Од друга страна, пак, повеќето луѓе се плашат да ја изнесат својата идеја, од страв некој друг да не им ја преземе. Разбирливо, но не секогаш оправдано. Освен во одредени случаи каде самиот производ/услуга што треба да се понуди на пазарот е сосем нов патент за кој мислите дека е круцијален за вашиот бизнис. Но тие производи/услуги најчесто немаат свои пазари, и многу е потешко да убедите некој клиент да го користи или употребува токму вашиот „фен за сушење на коса кој се полни на сончева енергија“ само затоа што таков немало досега!

Денес и не е толку важно од каде потекнува бизнис идејата. Таа може да дојде од каде било. Она што е важно е кој ја реализира и како ќе ја изведе. Никогаш не можете да бидетеe  сигурни дека токму вие, и само вие ја имате таа бизнис идеја и никој друг. Никогаш нема да дознаете дали додека вие размислувате како, на пример, да направите софтвер за менаџмент на хотели, некој си ваш врсник од Кина, Индија, или од соседниот град веќе ја има целосно осмислено и разработено програмата, и во моментот разгледува опции како истата да ја понуди на глобалниот пазар (преведена на неколку јазици), како бесплатен софтвер преку интернет. Или пак подоцна во весник прочитате дека на пазарот веќе постојат неколку локални компании кои го нудат истиот производ, заедно со бесплатни обуки за негово користење.

На пример, да земеме 20 луѓе, на сите да им дадеме по 5.000 евра и на сите да им кажеме да почнат одреден ист бизнис. Кога по 1 година дена би ги посетиле повторно да видиме до каде се со нивните бизниси, ќе имаме 20 потполно различни ситуации: некој ќе го има затворено бизнисот поради слаби приходи, некој ќе има изградено силен тим за продажба, некој од нив ќе го „порасне“ бизнисот и ќе се прошири, а некој можеби ќе се преориентира во друг сегмент од пазарот.  Сите луѓе и да сакаат не можат да водат одредени работи на сосема ист начин. Така е и со бизнис идејата, секој може да има слична идеја со некого или пак сосема иста, но начинот на реализирање на идејата сигурно нема да биде идентичен во двата случаи. Впрочем, погледнете наоколу, зошто и покрај толку многу продавници, бутици, ресторани и кафе-барови вие, сепак, преферирате само дел од нив? Зарем тие сите не се започнати со исти или слични идеи?!

Понекогаш дури е полесно да ја поделите вашата бизнис идеја со други луѓе за да добиете повратни информации од нив. Доколку вашиот бизнис биде наменет за поширока потрошувачка, би требало да ве интересира мислењето на вашите идни клиенти, нели? Или пак, доколку нудите услуги на други бизниси, би можело да добиете многу корисни совети доколку директно поразговарате со некој менаџер што, можеби, го познавате. Дури и не мора да бидат некои „посебни идни клиенти“! Можете едноставно да ги соберете пријателите, колегите или семејството, да им ја образложите вашата идеја и да ги замолите: „Доколку сте вие мојот клиент, што би сакале да добиете од мене (под кои услови, за која цена, на кој начин)?“ Можеби ќе видите колку вашите првични замисли се разликуваат (или поклопуваат) со нивните очекувања. Во тој случај, во најмала рака ќе дознаете дали сте на вистинскиот пат, или пак нешто се уште треба да се истражува или надополни (1).

Ако со некого си размените 100 денари, двајцата повторно ќе имате по 100 денари. Но доколку си размените по една идеја, двајцата ќе имате по две идеи, а истите би генерирале нови, или нов начин на размислување врз основа на истите!

Корисно е и да посетите некоја локална консултантска куќа или пак да побарате некој совет од локален експерт – тие сигурно имаат слушнато многу бизнис идеи и ќе ве упатат на евентуалните предности и недостатоци на одредениот тип на бизнис што сакате да го почнете. Доколку на пазарот веќе постојат одредени компании што работат врз нудење  исти или слични производи/услуги, може да се ставите во улога на клиент, да појдете до нив и изворно да ги дознаете сите карактеристики и услови на тоа што тие го нудат, или пак да поразговарате со некои од нивните клиенти.

Во секој случај, вашата бизнис идеја е вашата појдовна точка во бизнис светот, и сигурно дека сакате таа да прерасне во успешна приказна. Но за таа цел, ќе ви требаат и одредени знаења и бизнис вештини.

Не паничете, вие веќе ги имате…!