Рецесијата во технолошкиот сектор е завршена

Во неодамнешната студија на истражувачката компанија Forrester се покажа дека рецесијата во технолошкиот сектор е завршена.

Се предвидува потрошувачката во овој сектор да скокне за 8,1 процент во оваа година, наспроти падот од минатата година кој изнесуваше 8,1 отсто. Западна и Централна Европа се очекува да го забележат најсилниот раст со трошење од 11,2 проценти. Канада се смета дека ќе забележи раст на потрошувачката за 9,9 насто, додека во регионот на Азија и Пацификот ќе изнесува 7,8 проценти. Следи Латинска Америка со раст од 7,7 отсто, а САД ќе забележи раст од 6,6 проценти, додека во Источна Европа, Африка и на Блискиот Исток растот ќе изнесува само 2,4 насто.
-Падот на активностите во технолошкиот сектор од 2008 г. и 2009 г. неофицијално заврши – изјави аналитичарот Андрењ Бартелс од компанијата Forrester. Сите услови за овозможување на раст се исполнети за 2010 година. Продажбата на софтвери ќе забележи раст во светот околу 9,7 отсто, како резултат од побарувачката за новиот оперативен систем Microsoft Windows 7. Потрошувачката на хардвер ќе се зголеми за 8,2 проценти, додека трошоците за телекомуникациска опрема ќе бидат 7,6 отсто, се предвидува во студијата.